Туэ гужем Ижысь «Удмуртия» издательство поттüз тодмо журналистлэн, прозаиклэн но кылбурчилэн, улонысь вазь кошкем Эрик Батуевлэн, «Сюлэмлэн сэрего яръёсыз» («Ребристые берега души») книгазэ.

Со удмурт но Зуч кылын печатламын. Татчы пыремын кылбуръёс, веросъёс, новеллаос, публицистика, озьы ик ачиз Батуев сярысь гожъямъёс но интервьюос. Чапак соин ик та бичет мыным кельшиз: кин ке аслыз усьтоз верос гожъясь Батуевез, кин ке зол публицистэн тодматскоз, куинетüез кенешоз кылбурчиен. Татын со котыр ласянь адзиське. Авторлэн тросэз ужъёсыз нырысьсэ печатласько, соин но та книга кык полэс дуно.

Книгалэн азькылаз Эрик Батуевлэн анаезлэн, Анна Филипповналэн, тодэ ваёнъёсыз, пиезлы вазиськонэз.

- Мынам жöк вылам кык папка. öдüгаз, пие, ваньмыз тынад гожъямъёсыд люкамын. Со сокем трос но öвöл, озьы ке но мон понна тужгес дуноез, малы ке шуоно татын тынад кылбуръёсыд, веросъёсыд, кутскем но йылпумъямтэ романэд, журналистикая ужъёсыд, татын тынад малпанъёсыд но мылкыдъёсыд. Кыкетüяз папкаын кыллё тон сярысь гожъямъёс. Эшъёсыд, тодмоосыд тодазы ваё, тунсыко кылбурчи, кышкасьтэм но зэмлыкез утчась журналист шуыса. Таосыз гожъямъёс но мыным дуно, уго соос тон сярысь.

8 толэзьын тон нырысьсэ шуид «мама», 4 арес дыръяд тодüськод ни вал быдэс алфавитэз, 5-тü классысен гожтüд нырысетü кылбурдэ. Армиысь бертэмед бере шуид: писательлэн ужез бордаз кыске, МГУ-ысь журналистикая факультетэ пырыны тыршо. «Удмурт дуннеын» кöня ке ужаса, экзаменъёстэ сётыны кошкид. 1990-тü арын 20-тü декабре телеграмма лэзид: экзаменъёсме сётü, малпанэ быдэсмиз. Куинетü курсысен ужаны кутскид «АиФ» газетын. Вуылüд войнаен гомась Югославие, Афганистанэ, Таджикистанэ, собере вал Чечня. Тонэ косüзы Дудаевлэсь интервью басьтыны. Зуч солдатъёс берпуметü блокпост дорозь келязы но шуизы: та кырем сьöрын кузь нюлэс, отü огнад мынод. Со сюрес вылын тонэ пумитаны быгатоз чечен пуля но. Сюрес пумын тонэ дугдытüзы Дудаевлэн разведчикъёсыз. Чукнаозь ворсазы гулбече, нош Чуказеяз допрос лэсьтüзы. Огъёсыз юалляськизы, мукетъёсыз документъёстэ, диктофондэ эскеризы, пуштытондэ утчазы, куинетüосыз компьютер пыр «утчазы» кин луэмдэ. Тодüзы: тон зэмзэ но Россиысь журналист, Чечен война сярысь гожъясь адями, тыныд огкадь жаль потэ Россиысь но Чечняысь юнме бырись калык. Соос шуизы: иське, тон со, Батуев, Россиысь тужгес зэмлыко журналист? Дудаевлэсь интервью басьтэмед бере тонэ машинаен Грозныёзь келяло. Отысен вуид Москвае, собере - доре. Учкисько тусад, йырад, бур палаз, пурысьтам йырсиос…

2003-тü арын тонэ, Артём Боровикез, Андрей Вознесенскиез, Евгений Весникез сямен ик, усто кылбурчи, кышкасьтэм журналист луэмед понна данъязы «Венец» премиен. Жаляса верано, тон сое Öд тоды ни, - гожтэ Анна Филипповна.

Эрик Батуевлэн кышкасьтэм но зэмос журналист луэмез адзиське публицистикаяз. Аслан Масхадовен, Джохар Дудаевен, Шамсутдин Батукаевен, озьы ик Уйпал Кавказысь мукет кивалтüсьёсын но офицеръёсын материалъёссэ лыдзиськод но валаськод: Эрик Батуев югдурез умой тодэ. Со тыро-пыдо дасяськемын котькуд интервьюэзлы. Югдурез котыр ласянь возьматэ, эскере, аслэсьтыз малпанзэ шарая. Солэн гожъямъёсызлы оскиськод, уго со ас синмыныз ваньзэ адземын. Кужмо, визьмо, дüсьтüсь журналист.

Кылбур чуръёссэ лыдзыку, воксё мукет адямиен тодматскиськод кадь. Лякыт, туж востэм, вордскем палъёссэ, калыксэ яратüсь но дунъясь поэтэн, аслаз кылбуръёсыныз дан поттüсьтэм муртэн. Адямиослы гинэ умой мед луоз, нош аслыз - Чок, ойдо. Кылсярысь, «Кулü ке мон» кылбураз но:

Вылтырме тü сётэ кышнолы -
Мон солэн луо ни пыраклы.
Нош лулме тü сётэ Инмарлы -
Выль мугор шедьтоз солы.
Кылбурме тü сётэ тылскемлы -
Öжытлы ке но луоз югыт.

«Сюлэмлэн сэрего яръёсыз» 1 сюрс экземплярен печатламын. Та бичет вуоз шаерысьтымы школаосы но библиотекаосы.
Эрик Батуев 4 книга дасяз. Кыксэ, пиез кулэм бере печатлаз анаез. 2005-тü арын потüз «Уйшор вуюись» («Ночная радуга»), туэ - «Сюлэмлэн сэрего яръёсыз». Анна Филипповна верамъя, таяз бичетэ но Эриклэн вань гожъямъёсыз öз тэре на, ог куиньмос люкетэз кылиз.

- Озьы ке но мон бадзым тау шуисько та книгаез печатланы юрттüсьёслы: Удмурт Республикамылэн Президентэзлы, Кивалтэтэзлы, 13 ёрос администрацилы. Валералэн эшъёсызлэн, творчествозэ гажась но дунъясь адямиослэн юрттэменызы гинэ та книгаез али киямы кутэммы луэ, - шуиз со.