Удмурт литературалэн сюресэз Г. Е. Верещагин бордысен кутске. Озьыен, нылпи литературалэн кутскемез но азинскемез удмурт литературалэн кылдон-жутскон-будон аръёсыныз герзаськемын. Нырысетü удмурт писательёс но кылбурчиос мöйыослы гинэ öз гожъялэ, соос пиналъёс понна но тыршизы. Та ласянь Кузебай Гердлэсь, Ашальчи Оки-лэсь, Аркадий Клабуковлэсь но мукет авторъёслэсь творчествозэс пусйытэк кельтыны уг луы.

Туала удмурт нылпи литератураез басьтоно ке, И. Ивановез, У. Бадретдиновез, А. Ельцовез, В. Михайловез, Р. Игнатьеваез, Л. Малыхез но мукет авторъёсты пусйытэк кельтэммы уз луы. Ке-малась синйылтэмын ини: удмурт литератураын туж тросэз пичи нылпиослы быдэн одüг книга ке но кузьмало. (Кылсярысь, та сярысь верало А. Кузнецовалэн, Г. Романовалэн, В. Ар-Сергилэн но мукет авторъёслэн бичетъёссы).

Берло аръёсы нылпиослы книгаос сокем трос уг пото, соин ик котькуд сыче выль книгалэн дунне вылэ вордüськемез син азе усьытэк уг кыльы. Тани алигес «Удмуртия» издательствоын Лидия Нянькиналэн кык книгаосыз потüзы. Соос «Косьтэй но кыстыбей», «Ческыт кöмеч» шуыса нимасько. Автор татчыозь асьмелы прозаен «Ваёбыж кар» книгаеныз но «Синучкон» кылбур бичетэныз тодмо вал, нош табере тани Нянькина творчество удысын ассэ мукет ласянь но возьматэ. Нылпиослы сüзем кыл-буръёсыныз туала лыдзись тодмо öй вал на, дыр.

Соку ик вералом: книгаос умой пöрмиллям. Кылбуръёслэн задор мылкыдзылы, шуныт кужымзылы луыса, книгаос пичи лыдзисьёсты гинэ уг, бадзымъёсты но бордазы кыско. Пичи геройёссэ Л. Нянькина яркыт суреданы быгатэм. Автор ваньзэ сямен кылбуръёссэ лирической героезлэн нимыныз гожтэ. Нянькина кылбуръёсаз пичи адямилэсь дунне шоры учкемзэ зэмос мастер сямен возьматэ. Со пичи пинал понна тужгес дуно макеослы бадзым саклык висъя. Вань кылбуръёсын пичи муртлэн пуш дуннеез усьтüське. Номыр уд шуы: автор нылпиослэсь психологизэс туж умой вала.

Л. Нянькиналэн кылбуръёсысьтыз геройёс — со пичи ныльёс но пиос. Соос лякытэсь, мусоесь, ерпечка кадесь, соос сакесь, чыжы-выжыоссы, матысь адямиоссы сярысь тросгес тодыны тыршо. Котыразы мар ортче — соослы ваньмыз тунсыко. Пиналъёслэн паймымон улонэз валамзы потэ, соос инкуазьлэн нылпиосыз луо ук! Пичи геройёс асьсэлэн эшъёсынызы, песянайёсынызы-песятайёсынызы, апайёсынызы-агайёсынызы, сузэръёсынызы-вынъёсынызы шудо, верасько, озьы ик гурт пудо-животъёсын, инкуазен, мифологической персонажъёсын но, ява, огъя кыл шедьто.

Кылбуръёсын пöртэм учыръёс пыр нылпиослэн малпаськон öрзы но асьсэды кызьы воземзы адзиське. Котькуд пичи муртлэн сямен ик, нылашъёслэн шаплы-гес будэмзы потэ, соос чебергес луыны туртто, соин ик синучкон азьын кильтыръясько, ваньмыз соослэн чеберзылы мед паймозы кадь:

«Ку будо ини меда? —
Аслэсьтыз юа Лада.—
Ымдурме, синлысъёсме
Сыче потэ буяме!

«Мадам Лада»

Бадзым будыса, нылъёслэн выль кен но анай луэмзы потэ:
Туж соглаш мон Вадикен,
Луэме потэ выль кен!

«Мар-о кароз Вадике?»

Яке:
Будü ке, луо мама,
Отчыозь, ой, туж кема,
Мон ачим но, дыр, бабо,
Бабыса бадзым будо!

«Пепей Барби»

Пиослэн но шаплыгес будэмзы, бадзым, жужыт, кужмо луэмзы потэ:
Интыяз сылэ садик.
Пумитам потэ Вадик.
— Ку папа жужда луо, Мон тонэ кышно басьто!

«Мар-о кароз Вадике?»

Книгаосысь вань пичи персонажъёслэн улон котыразы шунды тылсиос пазясько. Соос, пичи ерпечкаос, азьланез сярысь малпасько, соин валче бадзым ужъёслы дасясько.

Нылпиослэсь психологизэс умойгес возьматон понна, Л. Нянькина кылбуръёсаз диалог амалэз кутэ. Озьы кылбуръёс уката но задор мылкьщо луо, шудон-веранлы пöрмо. Соос инсценировкаосын кутоно кадесь. Озьы ик кылбуръёсын пумисько нылпиослэн вераськоназы яратэм, эркиям мылкыдэз возьматüсь кылъёс. Кылсярысь, «чечым», «пепей», «баб, баб», «мам-мам», «йöлок»... Нянькиналэн геройёсыз сыче кылъёсыз матысь муртъёссылэсь кылыса, адзем карыса верасько но шудо.

Автор кылбуръёсаз, зэмос мастер сямен, маскара учыръёс кылдытья. Со учыръёсы, конешно, асьсэос нылпиос шедё. Авторлэн вань кылбуръёсыз пачылмемын лиризмен но иронией, соин ик кылбуръёс капчиен лыдзисько, быдэс произведение но аспортэмлыко шöм пыча.

Л. Нянькиналэн кылбуръёсыз кужмысь дышетон мылкыдын гожтэмын öвöл, озьы ке но соос пичи пиналъёсты трос зечезлы дышето. Ваньмыз со подтекст пыр возьматüське — туж капчиен, ирония пыр. Тани ма бордын авторлэн аспöртэмлыкез, кужымез, мастерствоез!

Та книгаос, вылаз ик, туж удмурт шöмоесь луо на. Книгаослы сыче шöм пыртыны юртто удмурт нимо геройёс: Исьтапан, Гери, Косьтэй. Геройёс пудо-животлы, чипы-куреглы удмурт сямен вазисько: тпуё, тпуё! гед, гед! сюку-сюку!.. Озьы ик та книгаысь пиналъёс тодозы яке тодазы ваёзы вунэтыны кутскем удмурт сиёнъёслэсь нимъёссэс: кыстыбей, кöмеч, чöжи. Нош макем мусо вазисько пичиос асьсэлэн матысь адямиоссылы: песяй, песятай, чужай, агай, апай...

Лидия Нянькиналэн «Косьтэй но кыстыбей», «Ческыт кöмеч» книгаосыз чебер иллюстрациосынызы бордазы кыско. Со суредъёсысь тü вуюисьлэсь вань ворпо буёлъёссэ синйылтоды. Татын ини художник Михаил Вахрин тыршем. Суредъёсызъя адзиське: таиз но нылпиосын туж эшъяське.

Книгаослэн нимъёссы удмурт сиёнъёсын герзаськемын бере, одно ик верам потэ: книгаос зэм-зэ но туж «ческыт» пöрмиллям.

Лидия Нянькиналэн нылпиослы кылем арын потэм книгаосыз.